Жаңалықтар

Меморандум бекітілді

Аудан әкімдігінің кәмелетке толмағандардың ісі және олардың​ құқықтарын​ қорғау​ жөніндегі​ комиссиясы аудандағы жасөспі рімдер арасындағы қылмыстың алдын алу және болдырмау мақсатында «Кәмелетке толмағандардың арасындағы қылмысқа қарсы күрестегі құқық бұзушылықтардың алдын алу саласындағы ынтымақтастық туралы меморандум»бекітті.

Ауданда атқарылған игі істер

Билік пен бұқара

Ауданда атқарылған игі істер

 

Аудан әкімі Болатбек Байтөленің тұрғындар алдындағы есеп беру кездесулерінің түйіні 13 ақпанда аудандық Мәдениет үйінде болды. Осыған дейін барлық ауылдық округтерді аралап, өткен жылы атқарылған жұмыстар жайын тізбелеген аудан басшысының қорытынды есебіне облыс әкімінің орынбасары Еркебұлан Дауылбаев қатысты.

Өндірісі мен өнеркәсібі қарқын алып, ауыл шаруашылығы шалқи түскен, әлеуметтік мәселелер межелі шешімдерін тауып, облыстағы маңдай алды аудандардің бірі саналатын өлкеміздегі оңды істер жетерлік. «Тәуелсіз еліміздің бүгінгі жеткен жетістігі Елбасы Нұрсұлтан Әбішұлы Назарбаевтың оңды саясаты мен халықтың бірлесе атқарған жемісті еңбегінің нәтижесі екендігі сөзсіз. Мәңгілік ел идеясын таңдаған қазақстандықтардың мақсат-міндеттерінің барлығы да бүгінгі күні «100 нақты қадам» Ұлт жоспарынан және қазақстандықтардың әл-ауқатын одан әрі арттыруға  міндеттелген «Қазақстандықтардың әл-ауқатының өсуі: табыс пен тұрмыс сапасын арттыру» атты Елбасы Жолдауы мен халықтың рухани санасын тереңдетіп, ұлттың болмысын сақтауға бағытталған «Рухани Жаңғыру», «Ұлы даланың жеті қыры» сынды мақалаларының аясында туындап отыр», – деп есебін бастаған Болатбек Байқонысұлы аудан экономикасын өрге сүйреп отырған өнеркәсіп саласында атқарылған жұмыстарға кеңінен тоқталып өтті. «Бүгінгі күнге аудан бойынша 26 кәсіпорын өнеркәсіп саласында жұмыс атқарып отырса, оның ішінде орта бизнес субъектілері – 2 және шағын бизнес субъектілері – 24. Ауданның өнеркәсіп саласының дамуы мен өнім көлемінің артуына  «Ақтас», «Ветро Инвест», «Виста Интернейшнал», «СП Синемедасстрой», «Камшат-Әсел» жауапкершілігі шектеулі серіктестіктері  сынды ірі кәсіпорындар өздерінің үлестерін айтарлықтай  қосып келеді. Өнеркәсіп саласындағы  жоспарланған индикаторларды орындау мақсатында  2 жаңа жоба – «Қордай Агротех» ЖШС-гі   және  «Қордай Корм» агроөнеркәсіптік кешені  жұмысын бастаса, сондай-ақ, 2018 жылы ауданда жұмысы тоқтап тұрған                 «Мастер РТИ»  және «Пош Ерасыл Ко» жауапкершілігі шектеулі серіктестіктері  қайта іске қосылды», – деді аудан әкімі.

Сонымен қатар сауда айналымындағы салалы істер, инвестиция тарту бойынша атқарылған ауқымды шаралар да баян етілді. Мәселен, 2018 жылы негізгі капиталға салынған жалпы инвестиция көлемі 21462,9 млн. теңгені құрап, бұл 2017 жылдың тиісті кезеңімен салыстырғанда 2228,1 млн. теңгеге артқаны атқарылған жұмыс ауқымын, тындырылған тірліктің көлемін өзі ақ көрсетіп отыр. Аудан бюджетінің бүйірін толтыратын салықтардың түсімі де былтырғы жылмен салыстырғанда арта түскені де баса айтылды. Бюджеттің кіріс бөлігінің өзінде салықтық және басқа да міндетті төлемдер бойынша жалпы салық түсімі 6385,1 млн. теңгеге жоспарланса, нақты орындалғаны 7141,6 млн. теңге немесе 111,8 пайыз болып, 756,5 млн. теңгеге артығымен орындалған. 2017 жылмен салыстырғанда түсімдер қарқыны 126,1 пайызды құраса, ауылдық округтердің бюджеті бойынша 512,9 млн. теңге жоспарланса, нақты орындалғаны 604,5 млн. теңге немесе 117,9 пайызды құрап, 91,7 млн. теңгеге артығымен орындалған.

Ауыл шаруашылығы салысындағы жетістер турасына келер болсақ, аудан шаруа қожалықтарының еселі еңбегі мен табысты  атқарған жұмыстарының нәтижесінде 2018 жылы егістік көлемі, 2017 жылмен салыстырғанда 709 га артып, масақты дақылдардың орташа өнімділігі жағынан  күздік бидай әр гектардан 25,3 центнер өнім берсе, жаздық арпа әр гектарынан  23,3 центнер өніп беріп, қамбаларға құйылған. Ал дәндік жүгері гектарынан  70,3 цент нер өніп беріпті. Майлы дақылдардың орташа өнімділігі өткен жылдармен салыстырғанда арта түскені байқалады. Сонымен бірге соңғы жылдары Қордайда қант қызылшасын өсіруді жаңғырту жұмыстары кең көлемде қарқын алып, аудан шаруалары межеленген мың гектарды еңсеріп, Меркі қант зауытына 21721 мың тоннадан  аса тәтті түбірді өткізіп, облыс бойынша жоғарғы көрсеткішке ие болған. Сонымен қатар субсидиялау, мал шарушалығы, ветеринария саласы бойынша да атқарылған жұмыс ауқымы айтарлықтай дәрежеге өскен.

Аудан басшысының есебінде тұрғындар көңілінен шыққан тағы бір мәселе  – тұрғын үй саласы бойынша болды. «Елбасының «Төртінші өнеркәсіптік революция жағдайындағы дамудың жаңа мүмкіндіктері» Жолдауының бесінші бағытында тұрғын үй-коммуналдық инфрақұрылымын жетілдіру бағытында нақты тапсырмалар берді.  Осы мақсатта ауданымызда тұрғын үй құрылысы кезең-кезеңімен жүйелі түрде жүзеге асуда. 2018 жылы 32,54 мың шаршы метрді құрайтын 318 тұрғын үй пайдалануға беріліп, нақты көлем индексі 58,6 пайызды құрады. Бекітіліген меже 32,0 мың шаршы метр болса, меже 101 пайызға орындалды. Сондай-ақ, қосымша жер учаскелерін беру мақсатында 2017 жылдан бері Қордай ауылында жалпы құны 708,3 млн. теңгені құрайтын «Шығыс-2» және «Солтүстік» тұрғын үй массивінің инженерлік инфрақұрылымы (жол құрылысы) салынуда, есепті кезенде 460,0 млн. теңге игерілді. Жұмыстардың аяқталу мерзімі 2019 жыл. Жалпы құны 983,2 млн. теңгені құрайтын «Қордай ауылының «Шығыс» және «Солтүстік» ықшам аудандарының жеке тұрғын алқабының инженерлік инфрақұрылымын су жүйесімен қамтамасыз ету» нысанына жобалық-сметалық құжаттама әзірленіп, 2018 жылы жобаны іске асыру үшін құрылыс басқармасына бюджеттік өтінім беріліп, нәтижесінде 2019 жылға 666,7 млн. теңге бөлінді. Нысанның аяқталу мерзімі 2020 жыл. Қордай ауылының «Шығыс» және «Солтүстік» ықшам ауданының жеке тұрғын үй құрылысы алқабының инженерлік инфрақұрылымын сумен жабдықтау желісі» нысанына жобалық-сметалық құжаттамасы әзірленуде. Аяқталу мерзімі 2019 жыл», – деген Болатбек Байтөле бұл жұмыстардың ардайым күн тәртібінен түспей, бақылауда екенін жеткізді. Білім саласын жетілдіру мақсатында ауданда ауқымды істер атқарылғандығы туралы аудан әкімі есебінде ол турасында да кеңінен мәліметтер беріліп өтті. Мысалы, «Цифрлы Қазақстан» мемлекеттік бағдарламасы аясында аудан бюджетінен 183,4 млн. теңге қаржы бөлініп,14 мектеп робототехника кабинеттерімен, 10 физика кабинеттерімен, 9 химия кабинеттерімен жабдықталған. Қордай, Қарасай батыр ауылдарындағы балалар мен жасөспірімдер шығармашылық орталықтарында ІТ-сыныптар ашылған. Үш ауысымды және апатты жағдайдағы мектептерді жою мақсатында Соғанды мен Көктөбе ауылдарында жаңа мектеп салынған, сондай-ақ, 4 орта мектепке күрделі жөндеу жұмыстары жүргізілген.

«Мектепке дейінгі білім беру ұйымдарында мемлекеттік білім беру тапсырысын іске асыру» бағдарламасы желісінде 2018 жылы 970 орынға 8 жекеменшік балабақша мен шағын орталық, 375 орынға қосымша топтар, жалпы 1125 орын ашылғаны да үлкен жұмыстың жемісі деп білуге болады. Денсаулық сақтау саласында өткен жыл тың жаңалықтарға толы болған. Мемлекеттік-жекеменшік серіктестік арқылы Жаңатұрмыс және Әлжан ана ауылдарында ауысымына 15 келушіге арналған дәрігерлік амбулаторияның құрылысы аяқталып, қолданысқа берілсе, Сондай-ақ, Көгадыр ауылындағы апатты жағдайдағы медициналық пункттің орнына жаңа 10 келушіге арналған медициналық пункт салынған.  Мәдениет саласы мен өзге де әлеуметтік салалар бойынша әлеуеті арта түскен ауданның қауіпсіздік саласына да аса ден қойып отырғанын да айтып өтті аудан әкімі.  Қордай ауданы әкімдігінің қолдауымен Қарасай, Қаракемер, Масанчи, Сортөбе және Ауқатты ауылдық округтері мен елді мекендерінің тыныштығы мен тұрғындардың қауіпсіздігін қамтамасыз ету мақсатында  Ауқатты ауылында 20 штаттық бірлікпен ауылдық полиция бөлімшесі ашылғаны соның айғағы.

Жалпы алар болсақ, қай салада болсын қарқынды дамуы бар, ауданның эеуметтік-экономикалық көрсеткіштерінде тың серпілістер мен үдемелі ілгерушілік анық байқалады.

Аудан басшысы баяндамасынан кейін сұрақ-жауап кезеңі басталды. Алғаш сөз алған аудандық ардагерлер кеңесінің төрағасы Біржан Әлімбет аудан экономикасының жыл санап артып келе жатқанын, жаңа мектептер мен медициналық мекемеллердің салынуы, елдің тұрмыс сапасы арта түскенін сөз ете келе, аудандағы қауіпсіздікті қамтамасыз ету мақсатында құқық қорғау қызметкерлері, әсіресе учаскелік инспектордарлы қызметтік көлікпен қамту аса маңызды екенін атап өтіп, осы мәселе бойына облыс әкімінің орынбасары Еркебұлан Дауылбаевқа өтінішпен қайырылды. Ал ауданның және облыстың «Құрметті азаматы» Төле Сүгірбай 2018 жылы атқарылған жұмыстардың нәтижесіне шын ризашылығын білдері келе, алдымен дұрыс саясат ұстанып, ел қамқорына айналған Елбасына алғыс айтуымыз қажет, деді. Сонымен қатар облыстың өркендеуі, Тараз қаласының түрлене түскеніне аз уақыттың ішінде сүбелі үлес қосып келе жатқан аймақ басшысы  Асқар Мырзахметовке алғысын айтты. Төле Аманжолұлы аудан басшысы жұмысына қанағаттанарлық деген оң бағасын бере келе, Қаракемер ауылдық мектебіне күрделі жөндеу жұмыстары жасалса және жаңадан салынатын жолдардың сапасына қатаң бақылау жасалса деген өтінішін де айтты. Осыдан кейін сөз алған аудандық Қоғамдық кеңес төрайымы Баян Қарамолдаева, ауданың Құрметті азаматы Тұрған Жасыбаев ақсақал ел бірілгі мен татулығы, еңбекқорлығы арқасында бүгінде ауданның жетіп отырған жетістігі, осындай жұмыстарды еңсерген азаматтардың жемісті еңбектері турасында айтып, өткен жылы атқарылған жұмыстарға қанағаттанарлық деген оң бағаларын берді. Айтпақшы, осы күні Қордай ауылының «Самал» ықшам ауданында тұратын тұрғындар үшін өте қуанышты жаңалық айтылды. Бұрын айналма жолды пайдаланып келген ықшам аудан тұрғындары биыл Төле би көшімен тікелей өтетін көпірді пайдаланатын болады. Оған қажетті қаржы да бөлініп, құрылыс жұмысы көп ұзамай басталмақ екен.

«Атқарылған игі істің бүгін куәсі болдық. Әрине, көптеген жұмыстар жасалуда, бірақ, алдымен халықтың әлеуметтік жағдайы жасалуы керек. Сол бағытта жұмыстарды жалғастыратын боламыз. Ақсақалдар көтерген мәселелер бойынша биыл полицейлерге автокөліктер алуға қаржы бөлінді, көліктер алынады, ал жолдар бойынша облыс деңгейінде зерделеу жұмыстары жасалып, елді мекен ішіндегі жолдарға да зерделеу жұмыстары жүргізілетін болады. Сіздер көтерген мәселелер мен сәлемдеріңіз облыс басшысына жетеді. Атқарылған жұмыстар жетерлік, алда атқарылар істер одан да көп. Барлық мәселелер кезең кезеңімен шешімін табады, тауып та келеді», – деген Е.Дауылбаев жиынға қатысушыларға алғысын айтып, сәттілік тіледі.  Көтерілген мәселерге тұшымды жауаптары беріліп, алға қойылған мақсат міндеттер жайы айтылған жиын жемісті өтті.

 

 

«Жер учаскелерін сатып алу-сату шарттарын жасасу»

Қазақстан Республикасы

Премьер-Министрінің орынбасары –

Қазақстан Республикасы

Ауыл шаруашылығы министрінің

24.01.2019 ж. № 25 бұйрығына
4-қосымша

 

«Жер учаскелерін сатып алу-сату шарттарын жасасу»

мемлекеттік көрсетілетін қызметі

 

Мемлекеттік қызметті облыстардың, аудандардың, облыстық маңызы бар қалалардың жергілікті атқарушы органдары көрсетеді.

Өтінішті қабылдау және мемлекеттік қызметті көрсету нәтижесін беру көрсетілетін қызметті берушінің кеңсесі арқылы жүзеге асырылады.

Мемлекеттік қызметті көрсету мерзімі: құжаттар топтамасы тапсырылған күннен бастап – 10 (он) жұмыс күні;

Мемлекеттік қызметті көрсету нәтижесі – жер учаскесін сатып алу-сату шарты не мемлекеттік қызметті көрсетуден уәжді бас тарту.

Мемлекеттік қызмет жеке және заңды тұлғаларға тегін көрсетіледі.

Көрсетілетін қызметті берушінің жұмыс кестесі – демалыс және мереке күндерін қоспағанда, дүйсенбі-жұма аралығында, сағат 13.00-ден 14:30-ға дейінгі түскі үзіліспен, сағат 9.00-ден 18:30-ға дейін. Өтінішті қабылдау және мемлекеттік қызметті көрсету нәтижесін беру сағат 13.00-ден 14.30-ға дейінгі түскі үзіліспен, сағат 9.00-ден 17:30-ға дейін жүзеге асырылады.

Мемлекеттік қызметті алуға қажетті құжаттар тізімі: 1) нысан бойынша өтініш; 2) жеке басты куәландыратын құжат.

Мемлекеттік қызметті көрсетуден бас тартуға мыналар негіз болып табылады:

1) көрсетілетін қызметті алушы мемлекеттік көрсетілетін қызметті алу үшін ұсынған құжаттардың және (немесе) олардағы деректердің (мәліметтердің) дұрыс еместігінің анықталуы;

2) көрсетілетін қызметті алушыға қатысты соттың заңды күшіне енген үкімінің болуы, оның негізінде көрсетілетін қызметті алушының мемлекеттік көрсетілетін қызметті алумен байланысты арнайы құқығынан айрылуы.

«Қазақстан –Ұлы дала мұрагері» атты танымдық кеш өтті

Елбасының «Болашаққа бағдар: рухани жаңғыру» бағдарламалық мақаласын Қордай ауданында жүзеге асыру мақсатында әзірленген желілік кестеге сәйкес  Әлжан ана ауылында «Қазақстан –Ұлы дала мұрагері» атты   танымдық кеш өтті. Басты мақсат – өсіп келе жатқан ұрпақ бойына елге, жерге деген сүйіспеншілігін, құрмет сезімін ояту. ЛЕД экранда бағдарлама аясында видеоролик көрсетілді.

Жаңа өңірде жаңа өмір

Жаңа өңірде жаңа өмір

Өткен сенбіде ауданымызға Солтүстік Қазақстан облысы Ғабит Мүсірепов

ауданынан делегация келіп, аудан тұрғындарымен кездесу өткізді.

 

 

Кездесуді аудан әкімінің орынбасары Б.Жамангозов ашып, жиналған тұрғындарды Солтүстік Қазақстан облысы Ғ.Мүсірепов ауданынан келген делигация өкілдерімен таныс-тырды. Өз кезегінде Ғ.Мүсірепов ауданының өкілі сөз алып, жиналғандарға өз ауданы жайлы мәлімет берді. Көшуге ниет білдіргендерге көмек көрсетуге, әр отбасын тұрғын үй және тұрақты жұмыспен қамтуға дайын екендігін айтып өтті. Сонымен қатар, биыл ауданда қоныс аударушыларға арнап 40 үй салынатынын тілге тиек етті.

Жалпы, қазіргі таңда елімізде ішкі миграция мәселесі өзекті болып тұрғаны жасырын емес. Оңтүстік өңірлерде халық саны жылдан жылға өсіп келсе, солтүстікте әр түрлі себептерден бұл көрсеткіш кему үстінде. Сол себептен Үкіметіміз халық санын және еңбек ресурсын бірыңғайландыру үшін халықты солтүстікке көшуге ынталандыру бағдарламасын іске асыруда. Осы орайда көшуге ниет еткен азаматтарға мемлекет тарапынан қандай көмек көрсетіледі деген еріксіз ой туатыны да анық. Бұған тоқтала кетсек, көшуге бел буған әрбір отбасы мүшесіне біржолғы 35 айлық есептік көрсеткіш (АЕК), яғни 88375 теңге төленеді екен. Ал, тұрғын үй жалдау үшін 1 жыл бойы ай сайын субсидия төленеді. Ол қалалық жерге көшкендерге: отбасы құрамында бір адам болғанда 20 АЕК 50500 теңге, 2-4 адам болса 25 АЕК 63125 теңге, ал 5 адамнан жоғары отбасыға 30 АЕК 75750 теңге төленеді. Ауылдық жерге қоныстанған отбасыларға: 1 адам болса 15 АЕК 37875 теңге, 2-4 адам болса 18 АЕК 45450 теңге, ал 5 және одан көп болғанда 21 АЕК 53025 теңге көмек көрсетіледі. Сонымен қатар, қоныс аударған азаматтарды жұмыспен қамту, балаларын балабақша, мектепке орналастыруға жәрдемдесу міндетін алмақ.

Аудандық жұмыспен қамту орталығының мәліметінше, өткен жылы солтүстікке Қордай ауданынан 44 отбасы қоныс аударыпты. Бүгінде аталмыш азаматтарға мемлекет тарапынан көрсетілетін тиісті қолдау көрсетіліп, тұрғын үймен қамтамасыз етіліпті. Олардың басым бөлігі ауыл шаруашылығымен айналасса, қайсыбірі мектеп, балабақшада еңбек етеді екен.

Тағы бір айта кететіндігі, биылғы жылдың 13-14 ақпан күндері Шығыс Қазақстан, Қостанай, Павлодар облысының өкілдері келіп, халық арасында үгіт-насихат жұмыстарын жүргізеді. Осы бағдарламаға қатысамын, солтүстік өңірге қоныс аударамын деген азаматтар жұмыспен қамту орталығына келіп, толық ақпарат ала алады.

Еркін Қатбеков

 

 

Халық қаһарманы халық ортасында

Халыќ ќаћарманы халыќ ортасында

Дүйсенбі күні ауданымызға жұмыс сапарымен Қазақстан Республикасы Парламенті Мәжілісінің депутаты, «Халық қаһарманы» Бақытжан Ертаев келіп, бірқатар өндірістік, әлеуметтік және мәдени нысандарды аралады. Халық қалаулысымен бірге аудан әкімінің орынбасары Болат Саниязов, аудан әкімі аппаратының басшысы Мырзағали Күзербаев жүрді.

Бақытжан Ертаев алдымен ауданның экономикасына елеулі үлес қосып келе жатқан «Первомайские деликатесы» ЖШС-нің заманауи қасапханасында болды. «Индустриалды-инновациялық даму» мемлекеттік бағдарламасы аясында 2017 жылы іске қосылған «Первомайские деликатесы» ЖШС ет өңдеу бойынша атқарып отырған жұмысының барысына депутат ризашылығын білдірді. Сондағы жұмысшылармен тілдесіп, заманға сай шетелдік жабдықтармен жұмыс жасайтын ауқымды өндіріс орны болашағының зор екенін ерекше айтып өтті. Мал сою алаңы озық технологиялардың көмегімен жабдықталып, толық күйінде жұмыс істеп тұрған серіктестіктің тың бастамалары көңілден шыққаны рас. Малды сою және етті өңдеу бөліктерінен тұратын өндірістегі әр цехта он бестен жұмысшы, одан бөлек басшы, инженер, техник, есепші, қызметкерлер тер төгеді. Әкелінген мал алдымен бөлек қорада демалдырылып, мал дәрігердің тексеруінен өткен соң, таразыға тартылып, біртіндеп сою цехына қабылданады. Мұнтаздай тазалыққа да аса ден қойылған. Осының барлығы халық қалаулысының көңілінен шығып, «өркендей беріңдер» деген тілегін де жеткізді.

Осыдан кейін Б.Ертаев аталмыш серіктестіктің шұжық цехында болды. Қайта жаңғыртудан өтіп, жұмысын жандандыра түскен цех шұжық өнімдерінің жүздеген түрін өндіреді. Ал, өнімнің ассортиментіне келсек, ол саудадағы сұранысқа сай ысталған, қайнатылған, бұқтырылған түрде жүздеген аталымға дейін өзгеріп тұрады. Заманауи техника мен технологияны қолданып, талапқа сай тұтыну тауарын шығарып отырған өндірістің болашаққа деген жоспары үлкен, мақсаты айқын. Бақытжан Ертайұлы цех қызметкерлерінің жұмысына сәттілік тіледі.

Келесі күні Мәжіліс депутатының ауданымызға жұмыс сапары 2017 жылы ашылған 2038 әскери бөлімінің әскери қалашығында жалғасты. Шекарашылармен жүздесу әскери бөлімнің мәдениет үйінде болып, онда Бақытжан Ертайұлы отаншылдық, елге, ұлтқа қызмет ету, әсіресе әскери қызметшілердің өз антына адал болуы турасында сөз қозғап, Елбасының көреген саясаты, еліміздің даму қарқыны және өзге де көптеген мәселелер бойынша әңгіме түйінін ағытты. Әскери қызметкер үшін барлық жағдай жасалған, отбасыларымен тұруға пәтерлері, жатақханасы және өзге де әлеуметтік нысандары жетерлік қалашықтың тұрғындарына Халық қаһарманы шекарашылардың еліміздің ең бірінші қалқаны екендіктерін ұмытпауды айтты.

Осыдан кейін Бақытжан Ертаев Ауқатты ауылдық округінде аудан әкімдігінің қолдауымен ашылған ауылдық учаскелік полиция бөлімшесін-де болды. Жиырмаға жуық қызметкер Ауқатты ауылымен қатар, Қарасу, Масанчи, Сортөбе, Қаракемер, Қарасай батыр  ауылдық округі тұрғындарына қызмет көрсетіп, құқықтық және қоғамдық тәртіпті қорғайды. Тәртіп сақшыларының жұмысымен танысып, учаскелік инспекторлармен сұхбаттасқан халық қалаулысына полицейлер ауылдағы қылмыстық ахуал жайында айтып, көптеген түйткілді мәселелерді тұрғындардың аудан орталығына бармай, осында шеше алатындықтарын жеткізді. Қызметкерлерге арналған бөлмелері, заман талабына сай жабдықталған мәжіліс залы, кезекші отыратын арнайы бөлмесі бар пункттің жұмысына да сәттілік айтылды. Мәжіліс депутаты осының барлығы халықтың игілігі үшін, тұрғындарға жасамалып отырған жағдай екендігін жеткізді.

Бақытжан Ертаевтың келесі барған нысаны – ажары ашылған Әлжан ана ауылы болды. Онда Мәжіліс депутаты алдымен Әлжан ана тарихи музейіне бас сұқты. Алдында әдемі бюсті қойылған, ішінің көркінен көз сүрінетін музейдің заманауи технологияларды пайдалана отырып көрсететін қызметі және өте құнды жәдігерлерімен музейдің экскурсоводы Әлішер Аяпберген таныстырды. Мұнда депутат музейдің Елбасының «Рухани жаңғыру» бағдарламалық мақаласы және «Ұлы даланың жеті қыры» мақалалары аясындағы жұмыстарды жандандыра түсіп, осындай кереметтей тарихи орынның ашылуының, әсіресе жастарға берері мол екенін айтып өтті. Осыдан соң Бақытжан Ертайұлы қайта жөндеуден өтіп, сән-салтанаты келіскен Әлжан ана ауылдық мәдениет үйінде болып, шығармашылық ұжымдардың жұмысымен танысып, кітапханасында болып, ауылдық басшылық және ақсақалдармен сұхбаттасты. Би өнерінен көптеген байқаулардың жүлдегері атанып, көзге түсіп жүрген «Нұрсұлтан» би ансамблінің тәрбиеленушілеріне де әрдайым намысты қолдан бермейтін азамат болуды айтып, шығармашылық табыс тіледі.

«20 жылға – 20 күй»

Ұлттық өнерді ұлықтау

«Нұр Отан» партиясының 20 жылдығына орай партия аудандық филиалының ұйымдастыруымен «20 жылға – 20 күй» атты челлендж-акциясы өткізілді.

 

Іс-шараның басты мақсаты қазақ халқының ұлттық аспаптық музыкасын, ата-бабамыздан бері келе жатқан ғажайып әуен сарынын дәріптеу болды. Осы орайда, «Бәйтерек» бастауыш партия ұйымына қарасты балалар мен жасөспірімдер шығармашылық орталығының ұстаздары өз өнерлерін ортаға салып, домбырамен бірнеше күйлерді орындап, видеоларын әлеуметтік желілерде жариялады.

Сонымен қатар, «Орталық» бастауыш партия ұйымына қарасты М.Төлебаев атындағы өнер мектебінің директоры Қалибек Бұтабаев, мұғалімдер  Арайлым Алимжанова, Қуаныш Ахметов, Санатбек Баекеновтар да өнерден алыс емес екендерін көрсетіп, тамаша күй шертіп, жиналғандардың ыстық ықыласына бөленді.

Ұлттық сана-сезім мен ұлттық мүдденің өркендеуіне үлес қоса алатын ұлттық құндылықтар мен жалпы адамзаттық құндылықтарды өзара ұштастыра алатын партия мүшелерінің өнерін насихаттау бұдан әрі де жалғасатын болады.

Қарасудағы қарымды істер

Құрамына Өтеген ауылы кіретін Қарасу ауылдық округі ауданымыздағы белді елді мекендердің бірі саналады. Соңғы кездері ауыл шаруашылығымен қатар кәсіпкерлігі, әлеуметтік саласында дамуы жақсы байқалатын округтің бүгінгі тыныс-тіршілігі өте жақсы. Аудан әкімі Болатбек Байтөленің тұрғындар алдындағы атқарылған жұмысы туралы есебінде біткен істің, тындырылған оңды тірліктің тиегі ағытылды.

Алдымен ауылдық округ әкімі Бектұр Кәмпитовтың бір жылда атқарған жұмысы туралы есебі тыңдалды. Былтырғы жылғы жоспарлы жұмыстардың жүйелі атқарылғаны туралы айтып өткен ауыл әкімі барлық салықтық түсімдердің де ойдағыдай орындалғанын жеткізді. Сонымен қатар, былтыр Қарасу ауылында «Өңірлерді дамыту» мемлекеттік бағдарламасы арқылы Кескентас көшесіне бөлінген қаржы толығымен игеріліп, жұмыстар ойдағыдай атқарылған. Сонымен қатар, Өтеген ауылындағы мешіт жанынан асхана ашылып, тұрғындардың қуанышына айналған. Ауыл әкімінің айтуынша, ауыл шаруашылық саласында және өнеркәсіп бойынша да алға ілгерілеушілік байқалады. Әсіресе, «Компания МИЛ» ЖШС мен «Қарасу кірпіш» ЖШС ауыл экономикасының дамуына оң ықпалын тигізіпті. Осыдан кейін аудан әкімі Болатбек Байтөленің 2018 жылы атқарған жұмысы туралы есебін мұқият тыңдаған ауыл тұрғындары өздерін қызықтырған сұрақтарын қоя отырып, атқарылған қыруар жұмысқа ризашылықтарын білдіруді ұмытпады. Ауыл тұрғыны Борис Долбня ауылдағы поштаға банкомат қойылса деген тілегін жеткізді. Бұл сұраққа аудандық пошта торабының басшысы Азамат Сапаралиев жауап беріп, банкомат негізінен тұрғындар санына қарай қойылатынын айтып, бірақ қазіргі таңда ауылдағы пошта бөлімшесінде «Post-терминал» жұмыс істейтінін және сол арқылы ақша алуға болатынын түсіндіріп берді. Тұрғындар тарапынан түскен сұрақтар қатарында ауылға болашақта мектепке қосымша құрылыс жұмыстарын жүргізу, мәдениет үйін салу, жарықтандыру жұмыстарын ретке келтіру сынды сұрақтарға да рет-ретімен жауаптар берілді.

Ауыл тұрғыны Владимир Лапатев ауылда атқарылған жұмыстарға қатысты өз ойын білдіріп, алдағы жылы ауыл әкімінің жұмысының ширайтындығынан үмітті екенін айтты. Осы тұста туындаған сұрақтар мен ұсыныстар бойынша аудан басшысы ауыл әкімі Б.Кәмпитовке бұл бағыттағы жұмыстарды қолға алып, тиісті жұмыстар жүргізу қажеттігін тапсырды.

Жиын соңында сөз алған Өтеген ауылының тұрғыны, Қордай ауданының Құрметті азаматы Тұрған Жасыбаев соңғы жылдары аудан бойынша атқарылып жатқан оңды істердің үлкен еңбекпен, қажыр-қайратпен келіп отырғанын жеткізіп, осы үшін аудан әкімі Болатбек Байтөлеге алғысын айтты. Осы жылға жоспарлаған жұмыстарының сәтті жүзеге асуына тілектес екенін жеткізді.

 

Өркенді ауылдағы өрелі істер

Өркенді ауылдағы өрелі істер

Аудан әкімі Болатбек Байтөленің халық алдындағы есеп беру жиыны әр ауылдық округті қамтып келеді. Бұл жолы келелі кездесу Сұлутөр ауылында жалғасын тапты.

 

Жалпы, дәстүрлі түрде өтетін билік пен бұқара кездесуіне жиналған тұрғындар саны көп болды. Есепті кездесу барысында тұрғындар ең әуелі ауыл әкімі Е.Мырзағұловтың, содан кейін аудан әкімі Б.Байтөленің есебін тыңдады. Округке қарасты екі елді мекен шағын болғанына қарамастан, тыныс-тіршілігі мығым. Шаруалар бидай, арпа, шабындық шөп егіп, жақсы өнім алған жайы бар. Мал саны да өсіп, ауыл шаруашылық саласында алға басушылық айқын сезіледі. Е.Мырзағұловтың сөзінше округтегі ардагерлер және жергілікті қоғамдастық кеңесі ауыл әкімдігімен бірлесе жұмыс жүргізе отырып, қолда бар қаражатты тиімді жұмсаған. Бұл қатарда көшелерді жарықтандыру, жолды қардан, төңіректі күл-қоқыстан тазалау сынды жұмыстар бар. Сонымен қатар, округте көгалдандыру жұмысы мықтап қолға алынған. Былтыр Сұлутөр ауылында «Жасыл белдеу» саябағы қоршалса, Көктөбедегі Жамбыл көшесіне құм-шағал төселіп, біраз ретке келтірілген. Тұрғындар қайырымдылық жасаудан алдына жан салмайды екен. «Мектепке жол» акциясы аясында жомарт жандардың көмегімен 40 оқушы мектепке қажетті дүниелермен қамтылса, айтулы мерекелерде тұрмысы төмен отбасыларға үнемі көмек көрсетіліп тұрады. Өткен жылы көктөбеліктердің қуанышына орай, су жаңа, заманауи 50 орындық мектеп ашылып, балалардың игілігіне берілді. Бұл еліміздің өркендеп келе жатқанының айқын бір дәлелі десек артық айтпаспыз. Жиын барысында ауылдағы атқарылған жұмыстарға жергілікті тұрғындар ризашылығын білдіре келе, өздерін толғандырған сұрақтарға мардымды жауап ала алды.

Келесі кезекте аудан әкімі Болатбек Байтөле Үлкен Сұлутөр ауылында есеп берді. Ауылдық мектептің акт залына жиналған көпшілік өткен жылы атқарылған жұмыстармен қоса, биылғы жылы алға қойылған міндет пен мақсаттарды естіді.

Ауылдық округ әкімі Д.Әбдіразақтың баяндамасы жағымды істерге толы болды. Округтегі салық түсімі ұлғайып, ауылдың бюджеті өсті. Қаражат ауылдың мұқтажын өтеуге толықтай жұмсалған. Баяндамадан байқасақ, ауыл тазалығына ерекше көңіл бөлінген. Көшелер жарықтандырылып, ауыл іші күл-қоқыстан тазартылып, оны жинайтын жәшіктер орнатылған. Ағаштар бұталып, әктеліп, қурайлар шабылып, арықтар тазартылған. «Жасыл белдеу» бағдарламасы аясында екі гектар жерге 5000 түп терек, 3000 түп қарағаш егіліп, ауыл күні ертең жасыл желекке оранбақ. Бұл жұмыстарға шаруалардың қосқан үлесі де қомақты. Ауылдағы Абылай хан көшесі жөнделіп, тұрғындардың ризалығына бөленді. Ауылда тіршілік көзі саналатын мал саны өсіп, шаруалар егістіктен мол өнім алды. Тұрғындар дәрігерлік амбулаториядан ем алып, балалар сапалы біліммен қамтылған. Қайырымдылық көмек көрсету жұмыстары да әрдайым назарда.

Ал, аудан әкімінің баяндамасынан тұрғындар аудан көлемінде атқарылған ауқымды істерді тыңдады. Тұрғындар арасында жеке басына қатысты сауалдар көп болды. Әр сұраққа орынды жауап берген Б.Байтөле ешкімді назардан қалдырмады. Аудан басшысы елдің ауызбірлігі болса, жергілікті қауымдастық пен әкімдік көмегімен алдағы уақытта да ауылды көркейте беруге айшықты істер жасалатынын жеткізді. Сол себепті де түйткілді мәселелерді бірлесе шешіп отыруға болатындығын айтты. Халық алдындағы есепті кездесуде ауыл тұрғындары жылдық жұмысқа лайықты баға беріп, өз алғыстарын білдірді. Ұсыныстарын айтып, сауалдарына жауап алды.

 

ҰБТ-ны жылына төрт рет тапсыруға болады

ҰБТ-ны жылына төрт рет тапсыруға болады

Қазақстан Республикасы Білім және ғылым министрлігімен Мемлекет басшысының тапсырмасына сәйкес, 2016 жылдан бастап жоғары білім алуға қолжетімділікті арттыруға байланысты жоспарлы жұмыстар жүргізілуде. Аталған жұмыстардың нәтижесі осы жылдан бастап ҰБТ-ны жылына 4 рет, яғни қаңтар, наурыз, маусым және тамыз айларында тапсыру мүмкіндігі болып отыр.

Тестілеу ақылы негізде өтеді, құны – 2242 теңге. Жалпы 2019 жылғы ҰБТ форматы еш өзгеріссіз қалатынын атап өткен, жөн. Оқуға түсуші дәстүрлі түрде 3 міндетті пән (Қазақстан тарихы, математикалық сауаттылық, оқу сауаттылығы) және 2 бейіндік пән бойынша тестілеуден өтеді.

Қаңтар, наурыз және тамыз айларында өткізілген ҰБТ-ы қорытындысы бойынша шекті балын жинаған тестке қатысушыға жоғары оқу орнында тек ақылы бөлімге түсуіне құқық береді. Сонымен қатар, ҰБТ-ны қаңтарда, наурызда тапсырғандар негізгі ҰБТ-ны маусым айында да тапсыра алады. Егер мектеп бітіруші түлек мемлекеттік білім грантын алғысы келсе, міндетті түрде мау-сым айында өткізілетін ҰБТ-ға қатысуы керек. Маусым айында тапсырған ҰБТ-ның қорытындысы бойынша білім беру грантын беру конкурсына қатыса алады.

Осы жылдың 19 қаңтарында ауданымызда бірінші «қысқы» ҰБТ өтті. Тестілеуден өткен  оқушылар саны саны – 402 (барлық бітірушілер саны 987), оның ішінде 351 қазақ сынып, 51 орыс сынып оқушылары. Шекті деңгейден яғни 50 балдан жоғары балл жинаған оқушылар саны 232 (немесе 57,7%). Ал 170 оқушының жинаған балдары  бекітілген межеден аса алмады. Яғни, бұл оқушыларға әлі де дайындық жұмыстарын жандандырып, білімдерін шыңдай түсуі қажет дегенді білдіреді.

Бейінді пәндер комбинациясы бойынша түсушілер «Математика-физиканы» 89 (22,1%), «Химия-биологияны» – 94 (23,3%) таңдаған. Бұл біздің түлектер Елбасының техникалық мамандықтарға білім беру гранттарының санын 20 мыңға көбейту жөніндегі әлеуметтік бас-тамасын дұрыс түсінетіндігін растайды.

Наурыз айындағы ҰБТ-ға қатысуға тілек білдірген оқушылар міндетті түрде ақпан айының 1-15 аралығында өтініштерін тапсыру қажет. Өтініштерді мектептерде немесе Д.Қонаев атындағы №1 мектеп-гимназиясында орналасқан Ұлттық тестілеу орталығының  филиалына тапсыруға болады. Наурыз айындағы ҰБТ осы айдың 24-29 аралығында өткізу жоспарлануда.

Қаңтар, наурыз айларындағы өткізілетін ҰБТ-ның басты басымдылықтары мен мүмкіндіктері!

  1. Маусым айындағы негізгі ҰБТ-ы тапсыру және білім гранттарын тағайындау конкурсына қатысу мүмкіндігінен айырмайды;
  2. Бейіндік пәндердің комбинациясын өзгертуге мүмкіндік береді. Мысалы: қаңтар айында: математика-физика, наурыз айында: математика – география;
  3. «Жеті рет өлшеп, бір рет кес» демекші, негізгі (маусым) ҰБТ-ға дейін сынақтан өтіп, білімдерін қайта тексеру;
  4. Тестілеуді өткізудің шарттары мен белгіленген ережелеріне бейімделуді қамтамасыз ету;
  5. Жоғары оқу орнының ақылы бөліміне таңдаулы (қаңтардағы немесе наурыздағы) сертификатпен қабылдану.

 

Е.Тайбеков,

аудандық Ұлттық тестілеу  орталығының  басшысы

Атқарылған іс ауқымды

Атқарылған іс ауқымды

 

Аудан әкімі Болатбек Байтөленің келесі күнгі халық алдындағы есеп беру кездесуі Сортөбе ауылдық округінде жалғасын тапты. Кездесуге қатысқан тұрғындар ашық сұхбат алаңында маңызды мәселелерді талқылап, оларға тиісті жауап алды.

Жыл сайынғы дәстүрлі кездесуді асыға күткен Сортөбе ауылының тұрғындары 31 қаңтар күні ауылдық мәдениет үйінде жиналып, кездесу округ әкімі Ильяс Буларовтың есебінен басталды. Баяндамашы өз сөзінде өткен жылы атқарған жұмыстарын жіпке тізіп, 2019 жылға белгіленген жоспарларымен бөлісті. Қордай ауданындағы ірі округтердің бірі болып саналатын аймақта 23878 адам тұрады. Мұнда қайырымдылық шаралары тура жолға қойылған. Мәселен, Елбасының «Болашаққа бағдар: рухани жаңғыру» бағдарламасы аясында кәсіпкерлер мен ауыл тұрғындарының демеушілігімен екі аз қамтылған отбасыға 10 млн. теңгеге тұрғын үй салынып, №16 орта мектебінің түлектері мен ұжымы мектепке 12 млн. теңгеге жүгіру жолы және жарық шамдары бар футбол алаңын сыйға тартқан.

Округ әкімінің есебінен кейін сөз кезегін Қордай ауданының әкімі Болатбек Байтөле алып, есепті мерзімде атқарылған жұмыстар мен ауданның әлеуметтік-экономикалық дамуындағы оң өзгерістерді баяндады. Жалпы, ауданда соңғы жылдары жаңа шағын аудандар аумағы кеңейтіліп, әлеуметтік нысандар бой көтеріп, жолдар жөнделіп, білім беру және денсаулық сақтау мекемелері көптеп ашылып келетініне қараша халық куә.

Осы ретте Болатбек Байқонысұлы округ тұрғындарына қатысты мемлекеттік бағдарламалардың орындалуына тоқталып өтті. Мәселен, «Автомобиль жолдарының қызмет етуін қамтамасыз ету» бағдарламасы бойынша жалпы ұзындығы 13,8 шақырым Сортөбе-Ауқатты-Қызылсай автожолының орташа жөндеу жұмыстарына республикалық бюджеттен қаражат бөлініп, жұмыстар аяқталды. Әрине, бұл әрлі-берлі қатынаған тұрғындардың игілігі үшін жасалған шара. Баяндама аяқталған соң ауыл тұрғындары өз сұрақтарын қойып, аталмыш жұмыстың бастауында болған аудан басшысы мен ауыл әкіміне ризашылығын білдірді. Осы ретте, бірнеше ауылды байланыстырған күре жолдың жөнделгеніне ауыл тұрғындары атынан көпбалалы ана Ф.Паншарова қамқорлығы үшін Елбасыға, облыс басшысына аналық алғысын айтты.

Келесі кезекте округ тұрғындары шекарадан өту мәселесі төңірегіндегі сұрақтарын қойды. Мәселен, шекара маңындағы ауыл тұрғындары шекара қызметкерлерімен қарым-қатынас, сонымен бірге «Сортөбе» бақылау бекетіндегі кептелістерді алға тартты. Аудан басшысы бұл мәселеден хабардар екенін тілге тиек етіп, тиісті мекемелермен жұмыс жүргізілетінін жеткізді. Яғни, жуық арада әскери прокуратура мен шекара қызметінің өкілдері ауыл тұрғындарымен жиын және түсіндіру жұмыстарын жүргізулеріне қолғабыс етілмек. Сонымен қатар, ауыл тұрғындары «Қазпошта» бөлімшесінің жұмысына қатысты сұрақтарын қойды. Аталмыш сауалдарға мардымды жауаптар беріліп, аудан басшылығының назарына алынды. Ал, жиын соңында ауыл тұрғындары аудан әкімі мен ауыл әкіміне алғысын айтып, қанағаттанарлық деген бағасын берді.

Кәсібі өрлеген мекен

Кәсібі өрлеген мекен

Аудан әкімінің бейсенбі күнгі кездесуі бекітілген кестеге сай Масанчи ауылының мәдениет үйінде өтті. Құрамына Масанчи, Күнбатыс-1, Күнбатыс-2 ауылдары кіретін округтегі есепті жиында атқарылған іс ағынан ақтарылып, тұрғындар көкейдегі сұрақтарына тұшымды жауап ала алды.

Халықтың қарасы көп жиылған жиын дәстүрге сай ауылдық округ әкімі И.Юбуровтың есебінен басталды. Өз баяндамасында ол Елбасының «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауы, «Рухани жаңғыру», «Ұлы даланың жеті қыры» атты бағдарламалық мақалалары аясында атқарылған тірліктерді жіпке тізді. Сондай-ақ, баяндамашы мемлекеттік бағдарламаларды іске асыруда жергілікті қауымдастықпен бірлесе атқарған ауқымды жұмыс жайында айтып өтті. Мәселен, көшелерді жарықтандыру үшін электр бағаналары алынып, Күнбатыс ауылында көше жарығы жөндеуден өткен. Сонымен қатар, көшелерге қиыршық тас төселіп, жолдарға орташа жөндеу жұмыстары жүргізілді. Мұнымен қатар, өткен жылы іске асырылған маңызды іс-шаралардың қатарына 60 орындық Құран оқыту орталығының ашылуын қосуға болады.

Өз баяндамасында Болатбек Байқонысұлы ұзындығы 30,5 шақырым Қарасу-Масанчи-Сортөбе жолының орташа жөндеуіне республикалық және облыстық бюджеттен қаржы қарастырылғанын, жөндеу жұмыстары жүргізіліп, биыл аяқталатынын атап өтті.

Жиын барысында кездесу қатысушылары туындаған сұрақтарын қойып, толыққанды жауаптарын алды.

Аудан әкімі аталмыш мәселені зерделеп, ақпан айында бюджетті нақтылау барысында инфрақұрылымның құрылысына қаражат қарастырылатынын жеткізді.

Сонымен бірге, масанчилықтар интернет жылдамдығының баяулығы, ұялы байланыстың сапасына қатысты мәселелерді көтерді. Бұл бойынша мамандар жауап беріп, тиісті шаралар қолға алынатын болды.

Барлық ұсыныс-пікірлер ескерусіз қалмай, өз кезегімен шешіледі. Ауыл тұрғындары аудан әкімі мен ауылдық округ әкімінің жыл ішінде атқарған жұмыстарына қанағаттанарлық деген бағаларын берді.

ТІРЛІГІ МЕН БІРЛІГІ ЖАРАСҚАН АУЫЛ

Аудан әкімі Болатбек Байтөленің халық алдындағы есебі осы күні түс ауа Қаракемер ауылында жалғасын тапты. Аудан, қала берді ауылдық округ аумағында атқарылған жұмыстар легі ағынан ақтарылған жиынға толығырақ тоқталып етсек.

Жалпы, тірлігі мен бірлігі жарасқан Қаракемер ауылында атқарылған іс ауқымды, шешімін тапқан мәселелер жетерлік. Бұлай деуге ауылдық округ әкімі Ж.Бақаев пен аудан әкімі Б.Байтөленің тұрғындар алдында жасаған баяндамасы дәлел. Атап айтсақ, өткен жылы ауылдың бес көшесіне 200-ге жуық көше шамдары орнатылып, «Өңірлерді дамыту» бағдарламасы аясында респуликалық және аудандық бюджет есебінен Төле би көшесінің 416 метріне, ал М.Мәметова көшесінің 600 метріне көптен күткен жөндеу жұмыстары жүргізілді. Сондай-ақ, округте жергілікті кәсіпкерлер есебінен 25 млн. теңгеге және 10 млн. теңгеге екі бірдей мал бордақылау алаңы құрылып, 45 млн. теңге қаражатқа су жаңа «Айсұлтан» жекеменшік балабақшасы қолданысқа берілді.

Ауыл әкімінің баяндамасынан белгілі болғандай окургте мүлік салығының жоспары 101 пайызға орындалып, жер салығының жоспары да межелі нәтижеге жеткен. Ауыл тұрғындарының негізгі табыс көзі – мал шаруашылығы саласында да өсім байқалады. Ал, еңбексүйгіштігімен өзгелерге үлгі бола білген қаракемерліктер абаттандыру және қайырымдылық жұмыстарынан шет қалмай, біршама көрсеткішке қол жеткізген.

Осы іспеттес атқарылған ауқымды істер қатарында Қарақоңыз өзенінің арнасын қалпына келтіру мәселесі де болғанын айта кеткен жөн. Естеріңізге сала кетсек, бұған дейінгі жиындарда тұрғындар өзен арнасының бірнеше жерден жырылып, трансформатор мен электр бағаналарына қауіп төндіргені жайлы жанайқайын жеткізген болатын. Енді міне, өткен жылы аудан басшысының бастамасымен бірнеше жылдан бері өзектілігі өршіп тұрған мәселе шешімін тапты. Яғни, 2018 жылы өзен арнасының 1720 метр қауіпті аумағын бекітіп, дамба жасауға аудандық бюджеттен қаражат бөлініп, аталмыш жұмыстар атқарылды. Ал, биыл қалған 350 метр жердің жөнге келтірілетіні белгілі болды. Осылайша, дер кезінде жасалған жүйелі жұмыстың арқасында күн тәртібіндегі тағы бір сұрақ шешімін тауып, Б.Орынтай, С.Әлиев, Н.Жайықбаев бастаған ауыл азаматтары аудан әкімі Б.Байтөлеге алғысын айтты.

Мұнымен қатар, ауылдың аудан орталығынан шалғай жатқанын алға тартқан қаракемерліктер былтырғы кездесуде аудан басшылығынан ХҚКО-дан анықтама алу мәселесінің қиындығын көтерген болатын. Аз ғана уақытта бұл мәселе де оңтайлы шешімін тапты. Көпшіліктің сұранысымен 2018 жылы ауыл әкімдігінің ғимаратынан бір реттік парольмен 50 қымет көрсететін «Қоғамдық бұрыш» журналы ашылып, халықтың жағдайы жеңілдеді.

Осылайша, өз ойын ортаға салып, ауыл әкімі мен аудан басшысының 2018 жылы атқарған жұмыстары мен ауданның әлеуметтік-экономикалық дамуынан құлағдар болған ауыл тұрғындары шешімін тапқан тірліктерге алғысын айта келе,  көкейдегі сұрақтарын жолдады.

Мысалы, ауыл ақсақалы Н.Жайықбаевтың типтік жаңа емхана салу және тозығы жеткен мектепке күрделі жөндеу жұмыстарын жүргізу жайындағы сұрағына аудан әкімі Б.Байтөле мемлекеттік жекеменшік әріптестік аясында ауылдағы ескі стадионның орнынан болашақта жаңа дәрігерлік амбулатория салу жоспарда бар екенін айта келе, мектеп мәселесінің облыс басшылығының назарында екенін алға тартты. Нақтырақ атсақ, Қаракемердегі ескі мектеп ғимаратының күрделі жөндеу жұмыстарын жүргізуге бюджеттік өтінім берілді. Осы мәселемен ауданымызға жұмыс сапарымен келген облыс әкімінің бірінші орынбасары Б.Орынбеков те танысып қайтты.

Сондай-ақ, жиында тұрғындар пошта ғимаратының жағдайына қатысты жанайқайын алға тартып, онда жөндеу жұмыстары мен жылыту жүйесін жүргізу қажет екенін бірауыздан айтты. Бұл мәселені аудан әкімі облыстық «Қазпошта» АҚ басшылығының назарына жеткізіп, хат жолдайтынын тілге тиек етті.

Осылайша, округке ортақ мәселелердің тиегін ағытқан жиын өз мәресіне жетіп, ауыл тұрғындары аудан басышының берген есебіне жақсы деген бағасын бере отырып, шешімін тапқан мәселелер үшін алғысын айтты.

Қордай ауданы әкімінің 2019 жылғы 29 қаңтардағы №19ө-ж/қ өкімімен Адылканов Берік Болатұлы Қордай ауданы әкімдігінің ауыл шаруашылығы бөлімінің басшысы болып тағайындалды

Қордай ауданы әкімінің 2019 жылғы 29 қаңтардағы №19ө-ж/қ өкімімен Адылканов Берік Болатұлы Қордай ауданы әкімдігінің ауыл шаруашылығы бөлімінің басшысы болып тағайындалды

 

Адылканов Берік Болатұлы 1988 жылы 16 мамырда Жамбыл облысы, Қордай ауданы, Қордай ауылында дүниеге келген.

Ұлты – қазақ. Білімі – жоғары.

2010 жылы Қазақстан-Бри-тан техникалық университетін қаржы бакалавры, 2012 жылы аталған университетті жергілікті мемлекеттік басқару және өзін-өзі басқару магистрі, 2014 жылы Алматы университетін заңгер мамандықтары  бойынша аяқтаған.

Еңбек жолын 2011 жылы Алматы қаласы бойынша  Қазынашылық Департаментінде бас маман-бас қазынашы қызметінен бастаған.

2011-2019 жылдар аралығында Алматы қаласы бойынша  Қазынашылық Департаментінің әкімшілік бөлімінің бас маманы, Алматы қаласы Әуезов ауданы әкімі аппаратының кәсіпкерлік және өндірісті дамыту бөлімінің бас маманы, «КМФ» жауапкершілігі шектеулі серіктестігінің Қордай бөлімшесінде несие сарапшысы, Қордай ауданы әкімі аппаратының ұйымдастыру-инспекторлық бөлімшесінің бас инс-пекторы, бөлімше басшысы қызметтерін атқарған.аға

ҚАРАСАЙДА ӨТКЕН ЖИЫН

Билік пен бұқара

Өрісіне құт дарыған мекен

 

Аудан әкімі Болатбек Байтөленің халық алдындағы есепті кездесуінің алғашқысы сәрсенбі күні Қарасай ауылдық округінен бастау алды. Аудан әкімі мен ауылдық округ әкімінің бірлескен есебіне аудан әкімінің орынбасарлары, бөлім, мекеме басшылары, құқық қорғау органдары мен бұқаралық ақпарат құралдарының өкілдері қатысты.

Қарасай – аудан орталығынан алшақ жатқанына қарамастан, шаруасы шалқыған, өрісіне құт дарып, ел ішіне бақ қонған ауыл. Бұл таулы аймақтағы елді мекеннің жайдары халқы мен ауылдың ажарлы келбеті кімді де болсын сүйсінтері анық. Соңғы жылдары мұнда талай уақыттан бері тұрғындар шешімін күткен күрмеуі қиын мәселелердің түйіні тарқатылып келеді. Бұған есепті кездесуге таң сәріден келген халық назарларына ұсынылған баяндамадан куә болды. Осындай еңселі істердің қатарына ауылға барар жолды, түнгі мезгілде жарқыраған көше шамдарын, кем-кетігі жөнделген ауыз су жүйесін қоссақ ағаттық етпес. Мұны аудан орталығына қатынаған ауыл жұртшылығы растап, атқарылған ауқымды іске алғысын айтып отыр.

Осы ретте, 2018 жылы ауылда қолға алынған жұмыстарға кезек берсек. Кездесуде белгілі болғандай, былтырғы жылы ауылда «Өңірлерді дамыту» бағдарламасы аясында жергілікті бюджеттен Жанқойлы би көшесіне ағымды жөндеу жұмыстары жүргізілсе, Бәйтелі батыр көшесіне асфальт төселді. Сондай-ақ, жоғарыда атап өткендей, таулы аймақтың табиғаты да ерекше. Мұнда көктем-күз мезгілінде жауған жауыннан сел жүру қаупі басым. Сондықтан, аудан әкімі Б.Байтөленің бастамасымен Сұраншы батыр көшесі жөнделіп, Қырғау көшесі грейдерленді. Көшелер жөнделіп қана қоймай, арық жүйелері кеңейтіліп, қажет жерлерге бетон плиталар орнатылды. Арық демекші, ауылда абаттандыру жұмыстарымен қатар, ауыз су мәселесі де ретке келтірілген. Мәселен, өткен жылы ауылдың ауыз су жүйесі «Қордай су» коммуналдық мемлекеттік кәсіпорнының теңгеріміне өткізіліпті. Осылайша, жарамсыз су жүйесінің құбырлары ауыстырылып, халықты сапалы ауыз сумен қамту мақсатында жергілікті бюджеттен қаражат жұмсалған.

Мұнымен қатар, ауылдағы сүт бағытында қызмет ететін «Болашақ» АШК «Фудмастер» ЖШС 70 тонна сүт өткізіп, «Шапырашты» ШҚ өз иелігіндегі қызылша алқабына 29,5 млн. теңгеге заманауи жаңбырлатып суару жүйесін орнатса, «Алатау-Қордай» ЖШС алтын-күміс кен орнын, «Азия сад» ЖШС интенсивті алма бағын құруды қолға алған. Округтегі игі істер тілге тиек етілген жиында тұрғындар тарапынан азын-аулақ сұрақтар да болды. Кездесу барысында қойылған сұрақтарға лайықты, олар жуық арада шешімін табатын болды.

Жиын соңында Қарасай ауылдық округі ақсақалдар алқасының төрағасы Асық Валиев, ауыл тұрғыны Жұмабек Тоқаевтар аудан әкімінің есебіне қанағаттанарлық деген бағасын беріп, атқарған ісіне алғысын білдірді.

Аудандағы туризм саласы

Ауданда туризм саласын дамыту мақсатында 4 инвест жоба іске асырылуда. Қасық ауылдық округінде этно-сау-мал орталығы, Кенен ауылдық округінде демалыс кешенін ашу жоспарлануда. Сондай ақ, Кенен ауылдық округінде «А» санатты «Батыс Еуропа-Батыс Қытай» автожолының жиегінде, Алматы-Ташкент-Термез автожолының 161 шақырымында қарама-қарсы екі сервистік кешен құрылысын салу жоспарланып отыр. Сарыбұлақ ауылдық округінде Алматы-Тараз автожолының 217 шақырымында «В» санатты (Тараз бағыты) және «С» санаты (Алматы бағыты) 2 жол сервистік кешені салынуда.

«Жамбыл менің жай атым, халық менің шын атым» атты аудандық ақындар айтысы өтті

Қордай аудандық мәдениет үйінде Елбасы Нұрсұлтан Әбішұлы Назарбаевтың «Рухани жаңғыру» мақаласы аясында талантты, дарынды жас ақындарды анықтап, олардың шеберлігінің шыңдала түсіп, көпшілікке танылуына мүмкіндік жасап, жастарға Жамбыл Жабаевтың шығармашылығын айтыс арқылы ұғындыру мақсатында   «Жамбыл менің жай атым, халық менің шын атым» атты аудандық ақындар айтысы өтті

«Қайырымдылық керуені» республикалық конкурсы

Қазақстан Республикасы, Астана қ., Ә.Бөкейхан көш., 1,

ҚР Тұңғыш Президенті – Елбасының Қоры

Баспасөз қызметі +7 7172 708 367 (369), +7 7783568138

E-mail: press.fpp@gmail.com

 

 

АҢДАТПА

«Қайырымдылық керуені» республикалық конкурсы туралы

 

Қазақстан Республикасы Тұңғыш Президенті – Елбасының Қоры,  Қазақстанның Іскер әйелдер қауымдастығы және «Хабар» Агенттігінің бірлескен  «Қайырымдылық керуені» республикалық байқауы жалғасуда. Ақпараттық қолдаушы – «КТК» телеарнасы.

Жобаның мақсаты – қайырымдылық идеяларын дәріптеу, белсенді азаматтық бастамаларды дамыту.

Байқауға әлеуметтік, қоғамдық проблемаларды шешуге және өздерінің жомарттығымен басқаларды мейірімділікке ынталандыруға үлес қосып жүрген жеке және заңды тұлғалар қатыса алады.

2018 жылғы қарашадан бастап 2019 жылғы ақпанға дейінгі кезеңде еліміздің барлық өңірінде конкурсанттарды іріктеу жұмысы жүргізіледі. Конкурс жеңімпаздарының есімдері ақпанның соңында – Алғыс айту күні мерекесінің қарсаңында белгілі болады.

Лауреаттар бес номинация бойынша анықталады:

«Асар» (номинация халықтың салт-дәстүрімен байланысты қайырымдылық қызмет көрсететін адамдарға қолдау көрсетуге бағытталған);

«Туған жер» (білім беру, экология және көріктендіру саласында туған өлкеге көмек көрсететін адамдарға беріледі);

– «Мейірім жолында» (аталымға ерікті негізде және тегін көмек көрсететін, игі істер атқаратын адамдар ие болады);

«Батыл жүрек» (номинация ерлік іс жасаған, жанкештілік танытқан адамға қолдау көрсету мақсатында тағайындалады);

«Қайырымдылық тарихы» (номинация БАҚ-та қайырымдылық тақырыбын қозғайтын, қоғамның назарын әлеуметтік проблемаларға аудартатын материалдардың жариялануынын қамтамасыз ететін журналистерге немесе шығармашылық ұжымға беріледі).

Конкурсқа кәсіпкерлік субъектілері және қайырымдылық қызметті  мемлекеттік қолдау арқылы жүргізетін тұлғалар (мемлекеттік грант, мемлекеттік тапсырыс және т.б.) қатыстырылмайды.

 

Тараз қаласы, А.Пушкин көшесі, 29. Электрондық пошта klub-zho klub-zho@mail.ru  87078010163. При распространении данного анонса каждая область вносит свои данные.

 

 

Жалындаған жастарға мол мүмкіндік берілмек

Жалындаған жастарға мол мүмкіндік берілмек

 

Жастар – еліміздің болашағы, қоғамның қозғаушы күші. Сол себепті де оларға көңіл бөліп, ойдағысын іске асыруға мүмкіндік берудің маңызы зор. Елбасы жастарды қолдап, жастар саясатын дамытуды қолға алу керектігін өз Жолдауында ашып айтқан болатын. Міне, биылғы «Жастар жылында» қандай тірліктер атқарылуы тиіс, түйткілді мәселелер қандай, осының барлығының басын ашатын трансляцияның куәсі болып отырмыз.

Әрине, талантты, талапты жастардың көбісі ауылда. Алайда, ауыл жастары қалалықтарға қарағанда көп мүмкіндіктен қалыс қалатыны жасырын емес. Сол себептен де Елбасы мұны да қаперге салды. Ол ауыл жастарына кәсіп ашып, іс бастауға көмек қолын созу керектігін ескертті. Осы орайда, ауданымыздың жастарына мол мүмкіндіктер берілетініне үлкен сеніммен қараймыз.

Бүгінгі жастар – ертеңгі білікті маман, бір ошақтың тірегі. Әрбір жас қоғамда өз орнын иемдену үшін бірінші кезекте әлеуметтік мәселелерге көңіл аударылғанын қалаймын. Ол әрине, баспаналы болу, тұрақты жұмыспен қамтылу. Жастардың өз білімін шыңдап, біліктілігін арттырудың маңызы да ерекше. Себебі, бүгінгі дамыған әлемдегі басты басымдық білімде. Спортпен шұғылданып, салауатты өмір салтын ұстануды да ұмытпаған жөн. Бұл үшін аудан басшылығы барын салуда. Жақында Қордай ауылында ашылған спорт кешені осының бір дәлелі.

2019 жылдан біздің күтеріміз көп. Арман мен мақсаттарымыз орындалып, биік белестерді бағындырарымызға үміт басым. Барлық аудан жастарын белсенділік танытып, Елбасының бастамасына қолдау көрсетуге шақырамын!

 

Елжас Қапархан,

аудандық «Жастар орталығы» КММ директоры

 

«Тәуелсіздіктің ұрпақтары» жастар жылының салтанатты ашылу рәсімі

Бүгін  Астана қаласындағы  ЭКСПО-2017 көрмесінің ааумағындағы «Нұр әлем» павильонында «Тәуелсіздіктің ұрпақтары» жастар жылының салтанатты ашылу рәсімі өтті.

Шараға Қазақстан президенті Нұрсұлтан Назарбаев, үкімет мүшелері, депутаттар, жастар саясаты жөніндегі кеңес мүшелері, «100 жаңа есім» конкурсына қатысушылар, «Болашақ» бағдарламасының түлектері, жас ғалымдар, жұмысшы, жас спортшылар, дарынды балалар, балалар үйінің тәрбиеленушелір мен сол жерден шыққандар, ерекше қажеттілігі бар жастар, әскери қызметшілер қатысты.

 

«Zhas project» жобасы аяқталды

«Zhas project» жобасы аяқталды

Еліміздегі жұмыссыз және кәсіпке қызығушылығы бар жастарды қолдайтын «Zhas project» жобасы өз мәресіне жетті. Ал, алты ай бойы белгілі бір кәсіпке дағдыланған аудан жастары күні кеше жоба аясындағы төрт күндік қорытынды тренингте бас қосты.

Өткен жылдың тамыз айында басталған аудандағы 14 жоба қызметін бүгінде сәтті аяқтап отыр. Ең әуелгі кезекте жастар төрт күндік тренингке қатысып, алда атқарар қызметін жоспарлап алған болатын. Арнайы оқу-жаттығудан өткен жоба қатысушылары міндеттелген мерзімде жоспарларын жүзеге асырды. Олар жергілікті жағдайы төмен, көпбалалы, аз қамтылған отбасыларға тегін көмек көрсетті. Мәселен, «Нұр», «Ірі қара мал шаруашылығы», «Му-Му», «Болашақ» және «Игі іспен – бизнеске» атты бес бірдей кіші жобаның мүшелері сиыр алып, сүт өнімдерін тегін таратумен айналысты. Ал, «Сиқырлы жұмыртқа», «Кіші құс фермасы» жобалары үй құстарын алса, «Шапағат», «Қымыз шаруашылығы» ұлттық сусын – қымыз өнімдерін қолға алған. Сондай-ақ, «Ең әдемі киім үлгісі», «Бал арасын өсіру», «Алтын нан» жобасының мүшелері де алты ай бойы өз өнімдерін мұқтаж жандарға тегін таратқан. Білім саласын қолдаған «Жасөспірімдер мен балалардың бос уақытын тиімді пайдалану» және «Старт компаниясы» жобалары жылыжай ашып, қияр өсіріп, өнімін тұрғындар игілігіне арнаған. Тамызда түскен миллион теңге қаржыдан бөлек жастарға жоба аясында әр ай сайын стипендия төленіп тұрды. Жоғары оқу орнын аяқтаған қатысушыға 60 мың теңге, ал арнаулы орта білімге 40 мың теңгеден ұсынылды. Мұндай керемет мүмкіндікті пайдалана білген жас кәсіпкерлер тағы да жобаны жалғастыруды көздейді. Дегенмен, жоба тек әр облысқа бір мәрте ғана аяқ басады. 2017 жылы ашылған жоба еліміздің төрт облысын қамтыса, 2018 жылы алты облыстан шамамен 3500 адам қатысқан. Осылайша, берілген алты ай мерзім ішінде тірлігін тиянақты тындыра білген жастар қорытынды тренингте бас қосып, өз жобалары бойынша атқарылған жұмыстары туралы есеп берді. Бұл күні олар кәсіпкерліктің қыр-сырына тағы бір мәрте үңіліп, төрт күн бойы келешекке бизнес жоспарын құрды.

– Біз бұл жобадан көп нәрсені түсіндік. Мен келешекте кәсіпкер болуды көздеймін. Оның бастапқы жолдарын аталмыш жоба арқылы біліп, қалай жүзеге асыруды да меңгердім десем артық айтқаным емес. Бізге осындай мүмкіндікті сыйлаған жоба ұйымдастырушыларына айтар алғысым зор, – дейді «Игі іспен-бизнеске» кіші жобасының мүшесі Бақтияр Қарабаев.

Арнайы «Жастар жылының» логотипі әзірленді

Арнайы «Жастар жылының» логотипі әзірленді, онда жыл сайынғы көші-қон кезіндегі тырналардың ұшуы көрсетілген. Ұшудың бұл тәсілі – үлкен құстарға энергияны көп қажет ететін қашықтықты еңсеруге мүмкіндік береді. Ұшу барысында әрбір құстың қанатының соңында әуе кептелісі пайда болады, осының арқасында құстар жинақыланып, бірлескен қимылдың арқасында қосымша көтерілу күшіне ие болады. Бірлескен табысты ұшудың негізгі ережесі – топ пен барлық еңбектің нәтижесін қатамасын ететін адал қарым-қатынастар. Аталған бастама жастардың өзара іс-қимылын көрсетудің ең жақсы тәсілі болып табылады. Тырналар мәңгілік жастық, бақыт пен сәттілікті бейнелейді. Жастар саясатындағы негізгі жетістіктерге бірлескен күш-жігерлер, тәжірибе алмасу және жастардың білімі арқылы қол жеткізілді. Авторлар логотиптің түстік гаммасына ерекше көңіл бөлген. Мысалға сары түс – позитивті энергетиканы, мерекені, күннің нұрын, көгілдір түс – кеңшілдікті, шығармашылық әлеует пен достық қарым-қатынасты білдіреді. Көк түс- рухани тазалық мен кемелдікті, қызғылт-сары түс – тұрақтылықтың, қуаныштың, достық қарым-қатынастың символы болып табылады.

«Жамбыл-менің жәй атым,халық-менің шын атым!» атты ақындар айтысына шақырамыз.

 

Хабарландыру!

 

Құрметті өнер сүйер қауым!

Сіздерді қаңтардың 23-і күні

аудандық мәдениет үйінде өтетін Елбасының

«Рухани жаңғыру»,

«Ұлы даланың жеті қыры» мақаласындағы жобаларды

орындау мақсатында аудандық «Жамбыл-менің жәй атым,халық-менің шын атым!» атты ақындар айтысына шақырамыз.

Басталуы:14.00.Кіру тегін.

«Соседушки» фольклор ансамблінің «Гармонь зовет» атты концерті өтті.

Қордай аудандық мәдениет үйінде халықтық «Соседушки» фольклор ансамблінің  «Гармонь зовет» атты концерті өтті. Концертте қазақ, орыс, украин халық әндері шырқалып, сондай-ақ бұл концертте «Ромашки» балалар тобы, халықтық «Аққу» би ансамбліде өнер көрсетіп көрермен ықыласына бөленді.

16.01.2019 ж. Жоспарлы-профилактикалық жұмыстар

16.01.2019 ж. Жоспарлы-профилактикалық жұмыстар

 

  1. 01.2019 ж. 03:00-ден 17: 00-ге дейін (Астана қ.уақыты), эфирлік цифрлық, аналогты телехабар тарату және радиохабар тарату желісінде жоспарлы- профилактикалық жұмыстары және жабдықтарды бақылау өлшемдері жүргізілетін болады. 2019 жылға жоспарланған профилактикалық жұмыстардың кестесі «Қазтелерадио» АҚ ресми сайтында орналастырылған.

Уақытша қолайсыздықтар үшін кешірім сұраймыз.

call-орталығы: 193, +7 (727) 2 581 500

e-mail: abonent@otautv.kz