Қазығұрт тауы (Кеме қалған)

Қазығұрт тауы (Кеме қалған)

​ ​ ​ ​ ​ ​ ​ ​ Шымкент​ қаласынан оңтүстікке қарай 35 км қашықтықта орналасқан. Солтүстік-шығыстан оңтүстік-батысқа қарай 55 км-ге созылған. Ортаңғы биіктеу бөлігінің ұзындығы 22 км, енді жері 10 км. Ең биік жері жотаның шығыс бөлігінде орналасқан (1768 м). Өзі аласа тау болса да, жер жүзіндегі таулардың қасиеттісі. Ілгеріде жер жүзін топан су басып кеткенде, жалғыз осы Қазығұрт тауы аман қалған екен. Қазығұрт тауының басында, күнбатыс жағында азырақ тегіс жер бар. Ол жер Нұқ пайғамбардың кемесінің орны дейді. Қазығұрттың басында бір үңгір болса керек. Ол үңгірдің үстіне ағаш шаншып қойған Қазығұрт атаның моласы дейді екен. Жаратқанның құдіретімен жер бетін топан су басқанда, тіршілік иелерін аман сақтап қалған сол кеменің құпиясын ашуға қаншама ғалымдар тер төкті. Алайда, сол сұрақтың сырын ашу, сол кеменің тоқтаған жерін дәлелдеу ешкімнің де еншісіне бұйырмай келеді. Әрбір қыр-сайы, әрбір өзен-бұлағы, әрбір үңгір-жотасы сол бір аңызбен тікелей астасып жатқан әлемдегі жалғыз мекен – Қазығұрт тауы.